Skip to content
Тројца пациенти со западнонилска треска кои се лекуваат на Клиниката за инфективни болести во Скопје се екстубирани и нивната состојба значително се подобрила, додека двајца други пациенти и натаму се во многу тешка состојба и се приклучени на респиратор, соопшти директорот на Клиниката, Фадил Цана. Според најновите податоци, во моментов на клиниката се хоспитализирани 19 пациенти.
Цана објасни дека петмина пациенти се лекуваат на одделот за интензивна нега и сите претходно биле во тешка клиничка состојба. Кај тројца од нив механичката вентилација веќе е прекината, што, според него, е знак на значително подобрување и се очекува нивното закрепнување да продолжи.
Кај преостанатите двајца пациенти состојбата останува многу сериозна и тие сè уште се на респиратор. Станува збор за најтешките случаи меѓу пациентите што моментално се лекуваат на интензивна нега.
Според податоците што ги соопшти Министерството за здравство, во земјава досега се регистрирани 55 случаи на западнонилска треска, од кои 53 се лабораториски потврдени. Од потврдените случаи, 52 пациенти биле или се хоспитализирани.
Во последната недела биле регистрирани пет нови случаи, што претставува намалување во споредба со претходните три недели, кога бројот на нови случаи неделно се движел меѓу девет и 11. Истовремено, се забележува промена во просторната распределба на новите случаи во Скопје, каде што тие сега почесто се регистрираат во северниот и североисточниот дел од градот.
Директорот на Клиниката посочи дека пациентите со најтешки форми на заболувањето главно се постари лица со повеќе придружни заболувања. Просечната возраст на хоспитализираните пациенти е 66,8 години.
Од почетокот на сезоната на пренос, Институтот за јавно здравје предупредува дека сите регистрирани случаи во првичниот период од 2026 година имале невроинвазивна форма на инфекцијата и биле хоспитализирани. Западнонилската треска се пренесува преку убод од заразен комарец, а потешките невролошки форми се многу поретки од самата инфекција.
Во меѓувреме, бројот на пациенти кои ја надминале инфекцијата се зголемува. Според најновите информации од Клиниката, 28 лица досега се опоравиле и се пуштени на домашно лекување.
