(ФОТО) Убиецот во Црна Гора кај себе имал два пиштола и повеќе од 230 куршуми

Кај Михаил Николаевич Шабуњин, осомничен за тројното убиство во Даниловград, полицијата пронашла два пиштола и повеќе од 230 парчиња муниција, соопшти црногорската полиција.

Оружјето и муницијата биле пронајдени во шумскиот предел над херцегновската населба Топла, каде што Шабуњин бил лоциран по полициската потрага.

Според досегашните информации, постои сомневање дека Шабуњин го зел оружјето и муницијата од стрелиштето во Даниловград по извршеното кривично дело.

Шабуњин беше осомничен за убиството на Немања Капор (20), Петар Глобаревиќ (24) и Момир Радоњиќ (67), кои беа пронајдени мртви на стрелиштето „Чешка зброевка“ во Даниловград.

По пукањето, осомничениот го напуштил местото и започнала полициска потрага по него.

Неговото возило „Seat Cordoba“ било пронајдено во областа Врањске њиве, во близина на ресторанот „Стефан“.

Според информациите објавени од RTCG, Шабуњин потоа стигнал до Подгорица, од каде што со такси заминал кон Херцег Нови. Подоцна бил лоциран во шумскиот предел над Топла.

Во полициската акција учествувале специјални и посебни полициски единици, припадници на Регионалниот центар за безбедност „Југ“ и граничната полиција. Во потрагата била користена и специјализирана опрема, како и хеликоптер на Армијата на Црна Гора.

Кога полицајците го опколиле, Шабуњин, според полицијата, отворил оган кон нив, по што извршил самоубиство со огнено оружје.

Пронајденото оружје и муниција ќе бидат предмет на понатамошно вештачење, а полицијата продолжува да ги утврдува сите околности поврзани со тројното убиство и бегството на осомничениот.