Skip to content
Китановиќ не дава оставка од директорската функција во Агенцијата за остварување на правата на заедниците, иако Владата побара од него да го повлече ставот со кој го величаше правосилно осудениот воен злосторник Ратко Младиќ. Далибор Китановиќ ја избриша спорната објава и му се извини на премиерот Христијан Мицкоски, но на 31 август јасно стави до знаење дека останува на позицијата.
Случајот започна откако Китановиќ објави фотомонтажа на која Младиќ беше претставен покрај личности од српската историја, со пораката „Генерали на небеската војска“. Реакцијата предизвика остри критики поради фактот што Младиќ е правосилно осуден за геноцидот во Сребреница, злосторства против човештвото и воени злосторства.
Владата се огради од ставот на директорот, оцени дека е личен и неприфатлив и соопшти дека ќе побара негово повлекување. Од Китановиќ беше побарано да се повлече од функцијата доколку не се согласува со владините политики, но формална одлука за негово разрешување досега не е објавена.
Китановиќ, пак, објасни дека дел од неговото најблиско семејство во Босна и Херцеговина ги преживеало воените околности благодарение на единиците предводени од Младиќ. Тој им се извини на премиерот и на членовите на Владата што биле вовлечени во политичкиот спор, но обвини дека неговата објава била искористена за политички напад. Тврди и дека немал намера да навреди или омаловажи кој било народ, вера или етничка заедница.
Со бришењето на објавата Китановиќ направи чекор назад, но не се откажа од директорската фотелја. Така, случајот се префрли од социјалните мрежи во институциите, каде што Владата треба да покаже што значи нејзиното јавно искажано очекување за политичка одговорност.
Претходно, Рацин.мк го отвори и прашањето за различните аршини на власта. Додека од Китановиќ се бара повлекување, такво барање не беше упатено до министерот Иван Стоилковиќ, чија Демократска партија на Србите во Македонија објави порака во која Младиќ беше претставен како генерал што му служел на својот народ. Нема потврда дека Стоилковиќ лично ја напишал објавата, но тој е претседател на партијата и член на Владата.
Случајот има и правна димензија. Анализата на Рацин.мк посочи дека членот 407-а од Кривичниот законик предвидува одговорност за јавно одобрување или оправдување геноцид, злосторства против човештвото и воени злосторства. Дали објавата на Китановиќ го исполнува прагот за кривично дело може да утврдат единствено надлежното обвинителство и судот, а самото повикување на оваа одредба не значи дека неговата кривична одговорност е веќе утврдена.
